ນັກຮຽນເກັ່ງ ນະຄອນຫຼວງວຽງຈັນ ຄອງຄວາມເປັນໜຶ່ງ ໃນການສອບເສັງນັກຮຽນເກັງຊັ້ນມັດທະຍົມສຶກສາ ລະດັບຊາດ ສົກຮຽນ 2016-2017 ພາຍຫຼັງຄວ້າລາງວັນຊະນະເລີດມາໄດ້ເຖິງ 5 ວິຊາ ໃນ 2 ຊັ້ນ. ຂະນະດຽວກັນ, ການສອບເສັງນັກຮຽນເກັ່ງສົກນີ້ ມີນັກຮຽນທີ່ສອບເສັງໄດ້ນັກຮຽນເກັ່ງ ອັນດັບທີ 1, 2, 3 ຄະແນນສອບເສັງ 7 ຂຶ້ນໄປ ຈໍານວນ 22 ຄົນ, ຍິງ 5 ຄົນ.
ການສອບເສັງນັກຮຽນເກັງຊັ້ນມັດທະຍົມສຶກສາ ລະດັບຊາດ ສົກຮຽນ 2015-2016 ໄດ້ສໍາເລັດລົງ ໃນວັນທີ 28 ເມສາ ຜ່ານມາ ທີ່ມະຫາວິທະຍາໄລແຫ່ງຊາດ ນະຄອນຫຼວງວຽງຈັນ ພາຍຫຼັງໄດ້ດຳເນີນມາແຕ່ວັນທີ 25 ເມສາ 2016 ໂດຍເປັນກຽດເຂົ້າຮ່ວມຂອງທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕີວ່າການ ກະຊວງສຶກສາທິການ ແລະ ກິລາ, ທ່ານ ສຈ.ດຣ ສຸກກົງແສງ ໄຊຍະເລີດ ອະທິການບໍດີ ມະຫາວິທະຍາໄລແຫ່ງຊາດ ພ້ອມດ້ວຍຫົວໜ້າກົມ, ຮອງກົມ, ບັນດາຜູ້ໃຫ້ການສະໜັບສະໜູນ, ພະນັກງານ, ຄູ-ອາຈານນໍາພາ, ນ້ອງນັກຮຽນ ແລະ ພໍ່-ແມ່ຜູ້ປົກຄອງເຂົ້າຮ່ວມຢ່າງພ້ອມພຽງ.
ໃນໂອກາດດັ່ງກ່າວ, ທ່ານ ນາງ ສີສຸກ ວົງວິຈິດ ຫົວໜ້າກົມມັດທະຍົມສຶກສາ ກະຊວງສຶກສາທິການ ກ່າວໃຫ້ຮູ້ວ່າ: ນັກຮຽນທີ່ສອບເສັງໄດ້ນັກຮຽນເກັ່ງລະດັບຊາດ ອັນດັບທີ 1, 2, 3 ທີ່ມີຄະແນນສອບເສັງໄດ້ 7 ຂຶ້ນໄປ ຈໍານວນ 22 ຄົນ, ຍິງ 5 ຄົນ, ໃນນັ້ນ ຊັ້ນມັດທະຍົມຕົ້ນ ມີ 9 ຄົນ, ຍິງ 4 ຄົນ ແລະ ຊັ້ນມັດທະຍົມປາຍ 13 ຄົນ, ຍິງ 1 ຄົນ, ເຊິ່ງຄະແນນສູງສຸດໃນຊັ້ນມັດທະຍົມຕົ້ນ ວິຊາພາສາລາວ-ວັນນະຄະດີ ໄດ້ 7,15 ຄະແນນ, ວິຊາຄະນິດສາດ ໄດ້ 9,50 ຄະແນນ, ວິຊາຟີຊິກສາດ ໄດ້ 8,25 ຄະແນນ ແລະ ວິຊາເຄມີສາດ ໄດ້ 8,00 ຄະແນນ. ສ່ວນຊັ້ນມັດທະຍົມຕອນປາຍ ວິຊາພາສາລາວ-ວັນນະຄະດີ ໄດ້ 7,50 ຄະແນນ, ຄະນິດສາດ ໄດ້ 8,00 ຄະແນນ, ຟີຊິກສາດ ໄດ້ 7,82 ຄະແນນ ແລະ ເຄມີສາດ ໄດ້ 8,10 ຄະແນນ. ຜ່ານການສອບເສັງນັກຮຽນເກັ່ງລະດັບຊາດ ຊັ້ນມັດທະຍົມສຶກສາ ສົກຮຽນ 2015-2016 ສາມາດຕີລາຄາໄດ້ວ່ານັກຮຽນເກັ່ງລະດັບຊາດ ມີກະຈາຍຢູ່ແຕ່ລະແຂວງ. ໃນນັ້ນ, ມີເພດຍິງ, ຊົນເຜົ່າ, ຕົວເມືອງ ແລະ ເຂດຫ່າງໄກສອກຫຼີກ, ເຊິ່ງສະແດງໃຫ້ເຫັນວ່າ ການສຶກສາໄດ້ມີການຂະຫຍາຍຕົວຢ່າງທົ່ວເຖິງໃນຂອບເຂດທົ່ວປະເທດ ແລະ ການຈັດການຮຽນ-ການສອນໃນໂຮງຮຽນມັດທະຍົມສຶກສາມີການພັດທະນາເປັນຂະບວນຟົດຟື້ນຕາມ 3 ຂໍ້ແຂ່ງຂັນທີ່ກະຊວງສຶກສາທິການ ແລະ ກິລາວາງອອກ.
ສໍາລັບຜົນການສອບເສັງນັກຮຽນເກັ່ງໃນຄັ້ງນີ້, ຊັ້ນມັດທະຍົມຕອນຕົ້ນ ອັນດັບທີ 1 ວິຊາພາສາລາວ-ວັນນະຄະດີ ແມ່ນ ທ້າວ ລັດຕະນະສິນ ສິງທະວົງ ໂຮງຮຽນ ມສ ຊົນເຜົ່າ ເມືອງວຽງໄຊ ແຂວງຫົວພັນ, ວິຊາຄະນິດສາດ ແມ່ນ ທ້າວ ເຕັງຮາງຊົງ ໂຮງຮຽນ ມສ ນໍ້າຖ້ວມ ເມືອງນໍ້າບາກ ແຂວງຫຼວງພະບາງ, ວິຊາຟີຊິກສາດ ແມ່ນ ນາງ ວົງດາລາ ວົງນະຄອນ ໂຮງຮຽນ ມສ ວຽງຈັນ ເມືອງຈັນທະບູລີ ນະຄອນຫຼວງວຽງຈັນ, ວິຊາເຄມີສາດ ແມ່ນ ນາງ ຈິນດາ ທະວີວັນ ໂຮງຮຽນ ມຕ ປາດຖະໜາ ເມືອງໄຊເສດຖາ ນະຄອນຫຼວງວຽງຈັນ ແລະ ຊັ້ນມັດທະຍົົົມຕອນປາຍ ອັນດັບ 1 ວິຊາພາສາລາວ-ວັນນະຄະດີ ແມ່ນ ນາງ ພຸດທິດາ ສຸກອາລຸນ ໂຮງຮຽນ ມສ ພອນສະຫວັນຊົນເຜົ່າ ເມືອງໄຊທານີ ນະຄອນຫຼວງວຽງຈັນ, ວິຊາຄະນິດສາດ ແມ່ນ ທ້າວ ອາຕົງ ໄຊຕົວ ໂຮງຮຽນ ມສ ສັນຕິພາບ ເມືອງ ແລະ ແຂວງຫຼວງພະບາງ, ວິຊາຟີຊິກສາດ ແມ່ນ ທ້າວ ມົວກ້ອງ ທ່າວໄຊລີ ໂຮງຮຽນ ພອນສະຫວັນຊົນເຜົ່າ ເມືອງໄຊທານີ ນະຄອນຫຼວງວຽງຈັນ ແລະ ວິຊາເຄມີສາດ ອັນດັບ 1 ແມ່ນ ທ້າວ ເກດວິບຸນ ສຸວິມົນ ໂຮງຮຽນ ມສ ມິດຕະພາບ ລາວຫວຽດ ເມືອງໄຊເສດຖາ ນະຄອນຫຼວງວຽງຈັນ. ສ່ວນຜົນການຖາມ-ຕອບວິທະຍາສາດ ແລະ ຄວາມຮູ້ຮອບຕົວ ອັນດັບທີ 1 ແມ່ນ ນະຄອນຫຼວງວຽງຈັນ, ອັນດັບທີ 2 ແມ່ນ ແຂວງຈໍາປາສັກ ແລະ ໄຊຍະບູລີ, ອັນດັບທີ 3 ແມ່ນ ແຂວງຫົວພັນ ແລະ ຊຽງຂວາງ ແລະ ລາງວັນຊົມເຊີຍ ແມ່ນ ແຂວງສາລະວັນ.
ไม่มีความคิดเห็น:
แสดงความคิดเห็น