ໄຂຂຶ້ນເປັນທາງການ ! ການສອບເສັງນັກຮຽນເກັ່ງລະດັບຊາດ ຊັ້ນມັດທະຍົມ ຂະນະທີ່ສົກນີ້ ສສກ ເນັ້ນຮັບປະກັນຄຸນະພາບສູງ

ໄຂຂຶ້ນເປັນທາງການ ! ການສອບເສັງນັກຮຽນເກັ່ງລະດັບຊາດ ຊັ້ນມັດທະຍົມ ຂະນະທີ່ສົກນີ້ ສສກ ເນັ້ນຮັບປະກັນຄຸນະພາບສູງ


ໄຂຂຶ້ນຢ່າງເປັນທາງການແລ້ວ ການສອບເສັງນັກຮຽນເກັ່ງລະດັບຊາດ ຊັ້ນມັດທະຍົມສຶກສາ (ມ4 ແລະ ມ7) ສົກຮຽນ 2017-2018 ໂດຍມີຜູ້ເຂົ້າຮ່ວມສອບເສັງຈາກ 17 ແຂວງ ແລະ ນະຄອນຫຼວງວຽງຈັນ ຈໍານວນ 144 ຄົນ, ໄດ້ສອບເສັງໃນ 4 ວິຊາ. ຂະນະທີ່ ໃນສົກນີ້ ກົມສາມັນສຶກສາ ກະຊວງສຶກສາທິການ ແລະ ກິລາ (ສສກ) ຮັບປະກັນໃຫ້ມີຄຸນະພາບ ແລະ ປະສິດທິຜົນສູງ.
ພິທີດັ່ງກ່າວ, ໄດ້ຈັດຂຶ້ນໃນເຊົ້າວັນທີ 24 ເມສາ ຜ່ານມາ ທີ່ສະໂມສອນໃຫຍ່ ມະຫາວິທະຍາໄລແຫ່ງຊາດ, ໂດຍເປັນກຽດຕັດຫົວບົດສອບເສັງຂອງທ່ານ ຮສ.ປອ ຄໍາຜາຍ ສີສະຫວັນ ຮອງລັດຖະມົນຕີກະຊວງສຶກສາທິການ ແລະ ກິລາ, ມີຫົວໜ້າ-ຮອງຫົວໜ້າກົມ, ຫົວໜ້າ-ຮອງຫົວໜ້າພະແນກ, ຂະແໜງ ມັດທະຍົມສຶກສາ, ພະນັກງານ, ວິຊາການ, ຄູ-ອາຈານນໍາພາ, ຜູ້ປົກຄອງ ແລະ ນ້ອງນັກຮຽນສອບເສັງເຂົ້າຮ່ວມຢ່າງພ້ອມພຽງ.
ໃນພິທີ, ທ່ານ ນາງ ປອ. ສີສຸກ ວົງວິຈິດ ຫົວໜ້າກົມສາມັນສຶກສາ ກະຊວງສຶກສາທິການ ແລະ ກິລາ ໄດ້ກ່າວລາຍງານໃຫ້ຮູ້ກ່ຽວກັບການຈັດຕັ້ງປະຕິບັດການສອບເສັງນັກຮຽນເກັ່ງລະດັບຊາດ ຊັ້ນມັດທະຍົມສຶກສາ ໃນສົກຮຽນ 2017-2018, ເຊິ່ງເປັນການສ້າງໂອກາດໃຫ້ນັກຮຽນໄດ້ສະແດງອອກດ້ານຄວາມຮູ້-ຄວາມສາມາດ, ພອນສະຫວັນ ແລະ ຫົວຄິດປະດິດສ້າງຂອງຕົນເອງ, ຍ້ອງຍໍຄູ, ນັກຮຽນເກັ່ງ ແລະ ເປີດໂອກາດໃຫ້ນັກຮຽນເກັ່ງທີ່ສອບເສັງໄດ້ອັນດັບ 1, 2 ແລະ 3 ແຕ່ລະວິຊາໄດ້ຮັບທຶນການສຶກສາເຂົ້າຮຽນໃນໂຮງຮຽນພອນສະຫວັນ, ຫ້ອງພອນສະຫວັນ ແລະ ເຂົ້າຮຽນຕໍ່ໃນມະຫາວິທະຍາໄລແຫ່ງຕ່າງໆໃນ ສປປ ລາວ. ທັງນີ້ ກໍ່ເພື່ອເປັນການວັດ ແລະ ປະເມີນຜົນສໍາເລັດດ້ານການສິດສອນຂອງຄູ ແລະ ດ້ານການຮໍ່າຮຽນຂອງນັກຮຽນ, ເປັນການຄັດເລືອກ ແລະ ສົ່ງເສີມນັກຮຽນເກັ່ງເປັນຕົວແທນຂອງຊາດໄປເຂົ້າຮ່ວມການແຂ່ງຂັນໃນລະດັບພາກພື້ນ ແລະ ສາກົນ, ສ້າງໂອກາດໃຫ້ຄູ ແລະ ນັກຮຽນໄດ້ແລກປ່ຽນປະສົບການໃນການຮຽນຮູ້ ແລະ ຖອດຖອນບົດຮຽນຮ່ວມກັນ ແລະ ເພື່ອເປັນສົ່ງເສີມຂະບວນການສອນດີ-ຮຽນເກັ່ງໃນໂຮງຮຽນມັດທະຍົມໃຫ້ມີບັນຍາກາດຟົດຟື້ນ ແລະ ມີລັກສະນະແຂ່ງຂັນກັນຫຼາຍຂຶ້ນ. 
ການສອບເສັງໃນສົກນີ້, ແມ່ນສອບເສັງ 4 ວິຊາຄື: ວິຊາພາສາລາວ-ວັນນະຄະດີ, ຄະນິດສາດ, ຟີຊິກສາດ ແລະ ວິຊາເຄມີສາດ ທັງ ມ4 ແລະ ມ7, ເຊິິ່ງມີນັກຮຽນເກັ່ງຈາກ 17 ແຂວງ ແລະ ນະຄອນຫຼວງວຽງຈັນ ຈໍານວນ 144 ຄົນ, ຍິງ 55 ຄົນເຂົ້າຮ່ວມສອບເສັງ. ໃນນັ້ນ, ຊັ້ນມັດທະຍົມສຶກສາຕອນຕົ້ນ (ມ4) ມີຈໍານວນ 72 ຄົນ, ຍິງ 30 ຄົນ, ຊັ້ນມັດທະຍົມສຶກສາຕອນປາຍ (ມ7) ຈໍານວນ 72 ຄົນ, ຍິງ 25 ຄົນ.
ສໍາລັບການສອບເສັງຄັ້ງນີ້, ກົມສາມັນສຶກສາ ສສກ ໄດ້ວາງມາດຕະການຢ່າງເຂັ້ມງວດ ເພື່ອເຮັດໃຫ້ການສອບເສັງນັກຮຽນເກັ່ງມີຄຸນະພາບ ແລະ ປະສິດທິຜົນທີ່ສູງຂຶ້ນ, ຄະນະຮັບຜິດຊອບຊີ້ນໍາລວມຕ້ອງມີຄວາມຮັບຜິດຊອບສູງ, ເປັນເຈົ້າການໃນການແນະນໍາວິທີການດໍາເນີນງານໃຫ້ແກ່ບັນດາອະນຸກໍາມະການຝ່າຍຕ່າງໆຕິດຕາມກວດກາ ແລະ ປະເມີນຜົນການປະຕິບັດວຽກງານໃນແຕ່ລະໄລຍະ; ກໍາມະການຕ້ອນຮັບ ແລະ ຈັດສົ່ງນັກສອບເສັງ, ຈັດສະຖານທີ່, ຍາມຫ້ອງເສັງ ແມ່ນປະຈໍາການຕາມຕາຕະລາງທີ່ແບ່ງປັນ ເພື່ອອໍານວຍຄວາມສະດວກໃຫ້ແກ່ຄູນໍາພາ ແລະ ນັກສອບເສັງ, ມີການປະສານສົມທົບ ຕິດຕໍ່ພົວພັນສະຖານທີ່ພັກເຊົາ, ຫ້ອງສອບເສັງ ແລະ ສະຖານທີ່ທ່ອງທ່ຽວຢ່າງລະອຽດ, ຈັດກິດຈະກໍາຕ່າງໆ ເພື່ອໃຫ້ນັກສອບເສັງໄດ້ມີສ່ວນຮ່ວມໃນການແລກປ່ຽນຄໍາຄິດຄໍາເຫັນເຊິ່ງກັນ ແລະ ກັນ ແລະ ປະຕິບັດຕາມກົດລະບຽບຢ່າງເຂັ້ມງວດ; ກໍາມະການອອກຫົວບົດ, ຂະໜານຕອບ ແລະ ກວດບົດສອບເສັງ ຕ້ອງຄົ້ນຄວ້າລະອຽດກ່ຽວກັບຫຼັກສູດ ສາຍສາມັນສຶກສາຂອງ ສປປ ລາວ, ຂອງບັນດາປະເທດໃນພາກພື້ນ ແລະ ສາກົນ, ຫົວບົດສອບເສັງຕ້ອງລະອຽດ, ຊັດເຈນ ແລະ ເຂົ້າໃຈແຈ້ງ, ໃຫ້ມີຄວາມຊື່ສັດບໍລິສຸດໃນການກວດບົດສອບເສັງດ້ວຍຄວາມຍູຕິທໍາ ແລະ ປະຕິບັດຕາມໂມງເວລາໃຫ້ເຂັ້ມງວດ; ກໍາມະການຕັດສິນຜົນການສອບເສັງໃຫ້ຕັດສິນຕາມຫຼັກການຂອງການສອບເສັງຢ່າງເຂັ້ມງວດ; ຄູນໍາພາໃຫ້ມີຄວາມຮັບຜິດຊອບສູງຕໍ່ການຊີ້ນໍາໆພານັກຮຽນຂອງຕົນໃຫ້ຢູ່ໃນຄວາມເປັນລະບຽບ, ປອດໄພ, ປະຕິບັດກົດລະບຽບການສອບເສັງ, ການໄປ-ມາ. ນອກຈາກນັ້ນ, ກໍ່ຕ້ອງເອົາໃຈໃສ່ໃນການຕິດຕາມກິດຈະກໍາຕ່າງໆກ່ຽວກັບການສອບເສັງ ແລະ ຖອດຖອນບົດຮຽນທີ່ດີຈາກຄູນໍາພາແຂວງອື່ນໆ ເພື່ອນໍາໄປຈັດຕັ້ງຜັນຂະຫຍາຍເຂົ້າໃນການຮຽນ-ການສອນໃນແຂວງຂອງຕົນ. ສໍາລັບນັກສອບເສັງ ໃນເວລາເຂົ້າຫ້ອງສອບເສັງໃຫ້ປະຕິບັດຕາມກົດລະບຽບຂອງການສອບເສັງຢ່າງເຂັ້ມງວດ, ເອົາໃຈໃສ່ປະຕິບັດຕາມລະບຽບຂອງສະຖານທີ່ພັກເຊົາ, ສະຖານທີ່ທ່ອງທ່ຽວ (ການຮັກສາຄວາມສະອາດ, ການເຂົ້າ-ອອກ, ການຮັກສາຄວາມສະຫງົບ), ເຄົາລົບນັບຖືຕໍ່ຄະນະຮັບຜິດຊອບການສອບເສັງ, ເຊື່ອຟັງຄູນໍາພາ ແລະ ສ້າງຄວາມສາມັກຄີຮັກແພງກັບໝູ່ເພື່ອນນັກສອບເສັງດ້ວຍກັນ.ຂະນະດຽວກັນ, ທ່ານ ຮສ.ປອ ຄໍາຜາຍ ສີສະຫວັນ ກໍ່ໄດ້ສະແດງຄວາມຍ້ອງຍໍຊົມເຊີຍຕໍ່ການສອບເສັງນັກຮຽນເກັ່ງລະດັບຊາດໃນຄັ້ງນີ້, ເຊິ່ງເປັນຄັ້ງທີ່ສໍາຄັນໃນການເຄື່ອນໄຫວຂະແໜງການສຶກສາ ໂດຍໄດ້ຈັດຕັ້ງເປັນປະຈໍາແຕ່ລະສົກຮຽນ ແລະ ຄັດໄດ້ນັກຮຽນທີ່ມີຄວາມສະຫຼາດທາງດ້ານສະຕິປັນຍາ ແລະ ຜູ້ທີ່ເປັນນັກຮຽນເກັ່ງລະດັບຊາດ ກໍ່ໄດ້ຮັບການຊຸກຍູ້ໃຫ້ສູງຂຶ້ນກວ່າເກົ່າ. ພ້ອມນີ້, ຍັງຮຽກຮ້ອງໃຫ້ນ້ອງນັກສອບເສັງຕ້ອງມີສະຕິ, ປະຕິບັດຕາມກົດລະບຽບຂອງການສອບເສັງໃຫ້ເຂັ້ມງວດ, ໃຊ້ການຄົ້ນຄິດໃນລະດັບສູງ, ຕ້ອງໃຊ້ຄວາສາມາດໃນການວິເຄາະວິໄຈ ແລະ ໂຈດທີ່ແກ້ຕ້ອງໃຫ້ໄດ້ຄໍາຕອບທີ່ຊັດເຈນ, ໃຊ້ຄວາມສາມາດໃນການສະຫຼຸບສັງລວມຢ່າງຄົບຖ້ວນ ເພື່ອເຮັດໃຫ້ການສອບເສັງໄດ້ຮັບປະສິດທິຜົນຢ່າງເຕັມເມັດເຕັມໜ່ວຍ.